Föstudagspistill 13. júní 2014

Það verður að viðurkennast að undanfarnar vikur hef ég ekki haft mikinn tíma aflögu sem ég get notað í heimasíðuna. Þann tíma sem ég hef þó haft, hef ég nýtt í síður sem þið sjáið ekki – enn sem komið er hið minnasta.

Það vita allir að snjóalög hafa verið óvenju mikil í Fljótavík í vetur og vor. Fyrir viku var gríðarlegur snjór eftir fyrir framan (innan) Langanes.

En – fólk er farið að koma í bústaðina. Þannig hefur fólk dvalið í Lækjabrekku, og búið er að vitja um Tungu. Bogga og Ingi fóru í Atlatungu um Hvítasunnu. Veit ekki um aðra bústaði – en fróðlegt væri þó að heyra.

Þar sem ég hef, eins og áður sagði, lítinn tíma aflögu, langar mig að varpa því fram hvort einhverjir þarna úti gætu ekki hugsað sér að setjast niður og skrifa pistla til birtingar hér? Það er í raun af mörgu að taka.

Ásgeir

Föstudagspistill 30. maí 2014

Eins og gengur, koma upp kringumstæður sem leiða til þess að maður getur ekki haldið einhverju til streitu. Ég var ég kominn með smá hefð fyrir að láta vita á föstudögum, um hvað ég hefði verið að bralla á heimasíðunni síðustu vikuna – en undanfarið hefur þetta riðlast.

Ég hef verið á flakki – erlendis og innanlands. Þannig náðum við á ball hjá BG í Edinborg á Ísafirði – og það var sko gaman – og sá viðburður tengist nú heldur betur Fljótavík – og við dvöldum nokkra daga á Ísafirði – af annarri ástæðu – og ég gæti tínt til fleiri afsakanir en látum það liggja á milli hluta.

En – ég hitti mann og annan – og ég heyrði að fólk saknar þess ef ekkert kemur. Ég sé líka á teljurum og línuritum að það er vaxandi fjöldi að fara inn á síðuna. Ég fæ þó lítil skrifleg viðbröðg eða ábendingar um hvæð ég ætti að gera….. eða gera betur. Ég sakna þess – og get ekki skrifað um það sem mér dettur ekki í hug – svo ég hvet enn og aftur til þess að þið sendið mér nú eitthvað til að mauðla úr.

Ég hef svo sem verið að bralla ýmislegt á síðunni – því það stendur yfir vinna við gerð upplýsinga um margt sem tengist Atlatungu – nokkuð sem kallast Gæðahandbók. Það kostar vinnu og heilabrot – og svo veit maður að margt af því sem er fullafgreitt í dag….. breytist á morgun – og þá þarf að breyta lýsingum upp á nýtt – en það  er nú bara smotterí. En – þó svona lýsing sé á heimasíðunni – þarf aðgangsorð til að komast þar inn – en það er hægt að gera svona fyrir aðra bústaði líka……. og þá með öðrum aðgangsorðum. Ég var búinn að fara yfir þetta áður.

Það sem helst er nýtt á síðunni nú er að ég var að yfirfæra söguna um “Sviplegt fráfall tófu” frá gömlu síðunni.

Ásgeir

18.maí 2014…… 40 ár frá ísbirni

Þennan dag, 18.maí, fyrir 40 árum, eða 1974, var ísbjörn veginn við skýli SVFÍ í Fljótavík. Það er búið að segja svo oft frá þessu og skrifa að sumum fer að líða eins og þeir hafi verið á staðnum, eins og einn aðili skrifaði inn í blogg þegar þessi heimasíða birti fásögn Jósefs H Vernharðssonar af þessu. En í tilefni dagsins væri ekki úr vegi að renna enn einu sinni yfir þetta t.d. með því að lesa frásögn Jósefs, og/eða blaðafregnir sem skoða má út frá TÍMALÍNUNNI við þennan dag árið 1974.

Ásgeir