Föstudagspistill 2.maí 2014

Ég þjófstarta hér, hvað dagsetningu yfirskriftarinnar varðar,  því þegar ég skrifa þetta og birti – er í raun fimmtudagur 1.maí. Ég bara gat ekki beðið því Örn Ingólfsson flaug yfir Fljótavík í gær og sendi spennandi myndir sem ég birti hér undir flipanum Myndir > Myndir 2014. Skoðið og njótið.

(Annars er ég erlendis í fríi)

Ásgeir

Föstudagspistill: 25.apríl 2014

Ég hef viljandi haldið mér frá því að setja inn myndir á heimasíðuna http://www.fljotavik.is/  . Það hafa verið nokkrar ástæður fyrir því, eins og:

1) Það er hreinlega mikilvægara að reyna að safna upplýsingum (á textaformi) um hið liðna – því myndirnar bíða bara…

2) Það litla sem ég hafði séð af möguleikum forritsins “WordPress” til að sýna myndir, höfðaði einhvern vegin ekki til mín….

3) Gamla myndasíðan – www.123.is/fljotavik , er enn virk og þeir sem vissu það gátu bara farið þangað….. og …

4) Myndir taka töluvert pláss á netinu – og fyrst myndir voru áður komnar – samanber 3) – þá lá bara ekkert á því.

En – einhvern tíma verður maður að byrja á þessu – og hér kemur það. Ég birti í dag myndir undir : www.fljotavik.is > Myndir > Myndir 2010 . Þessar myndir eru sérstakar – þar sem þær eru frá “vinnuferð” í Fljótavík – um hávetur! Örn Ingólfsson flaug með valinkunna menn í ferbrúar – og lenti í sandfjörunni í ósnum. Hann gekk um hluta af láglendi Atlastaðalands og tók þær myndir sem nú birtast hér. Notfærið ykkur möguleikann á að skrifa undir myndirnar – líkt og á Facebook. Ásgeir

Föstudagspistill 18.apríl 2014

Nú verður það stutt.

1)    Fyrst legg ég áherslu á að fólk lesi “bloggið” hér fyrir neðan um Óbyggðanefnd og mikilvægi þess að koma þinglýsingarskjölum í lag – og viðhalda því svo í lagi! Í því sambandi bendi ég líka á yfirsíðuna “Landeigendur“.

Um páska er fólk að fara landshluta á milli – eldri og yngri kynslóðir hittast – notið tækifærið og ræðið þetta!

2)    Ég læði stundum inn nýjum tengingum í “Tímalínuna” – og sem dæmi bendi ég á að við ártalið 1949 er nýr hlekkur um Gunnvör og eins við árið 1974 þar sem er hlekkur í viðtal við Helga Geirmundsson vegna ísbjarnarins.

3)   Þá birti ég afrit af friðunarskjali skálatóftar Vébjarnar signakappa. Í skjalinu kemur fram að eigendum jarðarinnar beri að varðveita skjalið. Mér segir nú svo hugur um að þann 16.júní 1946 hafi þetta skjal ekki verið efst í huga þeirra eigenda jarðarinnar sem síðastir yfirgáfu víkina fögru – en það væri nú samt gaman að vita hvort einhver viti hvort þetta (frumrit) hafi verið varðveitt einhvers staðar allan þennan tíma?

…þetta varð nú bara lengra en til stóð….

Ásgeir

Föstudagspistill: 11.apríl 2014

Undanfarið hef ég kallað þessi skrif: “Föstudagspistil” , og svo hefur dagsetning dagsins komið á eftir. Þó ég hafi verið með síður í vinslu þessa vikuna, ætla ég ekki að uppfæra neinar nú – en  birta þess í stað neðanritað “blogg” – svona til að reyna að íta við fólki.

Réttari yfirskrift gæti verið:

Hvað er Óbyggðanefnd að gera – ert þú að fylgjast með?

Lög segja að í þinglýsingarskjali landareignar í dreifðri eignaraðild, skuli vera getið um fyrirsvarsmann. Til að leggja frekari áherslu á það – er ekki lengur hægt að breyta þinglýsingarskjali þar sem þetta á við, nema nafn fyrirsvarsmanns sé komið á skjalið. Með dreifðri eignaraðild, er í lögunum átt við það ef eigendur eru fjórir eða fleiri, og því á þetta við um Atlastaði og Skjaldabreiðu. 

Fyrir nokkrum árum ritaði Sýslumaðurinn á Ísafirði bréf um málið og gekk Hörður Ingólfsson í það að koma þessu í lag.  Niðurstaðan varð að Atli Ingvarsson er skráður fyrirsvarsmaður fyrir Atlastaðalandi, en hvað Glúmsstaði og Tungu varðar – er málið einfalt því það er einn eigandi. Mér er ekki kunnugt um hvort fyrirsvarsmaður sé skráður á þinglýsingarskjal Skjaldabreiðulands.

Samkvæmt heimasíðu Óbyggðanefndar, er búið að úrskurða um flest svæði landsins – Snæfellsnes og að Gilsfjarðarbotni verða næst tekið til umfjöllunar – og þar á eftir, sem næst síðasta svæði landsins verða Vestfirðir teknir fyrir í heild sinni. Það styttist því hratt í þetta – og eins og ég hef áður gefið í skynverða landeigendur að vera tilbúnir til að gefa álit, sem ein heild með stuttum fyrirvara þegar að því kemur – og það þarf því að vera á hreinu – hverjir eru landeigendur, því aðeins verður hlustað á þá.

Ég hef heyrt orðróm um að þegar komi að Hornstrandarfriðlandi, muni ríkið gera kröfu um að eignast allt svæðið í heild sinni, meðal annars á þeim forsendum að þarna hafi engin landnýting átt sér stað í marga áratugi. Vonandi er þetta bara orðrómur…..

Ég á enga aðkomu að eignarhlut í Fljótavík, og í mínum huga erfast hlutir eftir blóðböndum. Reyndar má vera að einfaldast sé að gleyma því hver á hvaða hlut – og líta á Fljótavík sem almenningseign……….. eða hvað…… ?

Nei – ég held nú að rétt sé að þið sem eigið  land – eða bara líklegan erfðarétt að landinu í Fljótavík, ættuð að reyna að halda í það – og því vil ég enn og aftur hvetja til þess að þinglýsingarskjali hverrar jarðar fyrir sig verði komið í lag eins fljótt og auðið er. Þið sem yngri eruð ættuð að spyrjast fyrir um þetta hjá þeim sem eldri eru….

Eins og alltaf – þá er orðið laust, og umræður og þá eitthvað sem kemur mér á réttari leið ef ég veð í villu – vel þegið. Veljið “Leve a reply” – lengst til vinstri undir yfirskriftinni – og þá opnast gluggi sem þið notið til að skrifa það sem þið viljið segja – og síðan þegar þið eruð tilbúin til að birta umsögnina, þurfið þið að “reikna” smá dæmi til þess að sanna að þið séuð ekki einhver leitartölva úti í heimi – sem er að reyna að koma skilaboðum inn á síðuna….. nokkuð sem er reynt oft á dag..

Ásgeir

Föstdagspistill: 4.apríl 2014

Það vorar – eða í það minnsta – það hlýtur að fara að koma vor!  Fyrir tveimur árum held ég – var flogið í vinnuferð til Fljótavíkur í febrúarmánuði…. og þá var nú bara allt autt á jafnsléttu….. en nú er kominn apríl, og þó öldin sé sú sama og þá … ja – þá er öldin önnur – eða þannig!

Í þessari viku birti ég tvær síður – og nú eru það Vennarnir:

1)    Lífsferill Vernharðs Jósefssonar og Maríu Friðriksdóttur á internetinu. Vernharð fæddist að Atlastöðum, og bjó sem bóndi bæði í Tungu og Skjaldabreiðu í Fljótavík, auk þess að vinna á uppvaxtarárum sínum á Atlastöðum.

2)     Birti bréf Vernharðs til Sölva Betúelssonar þar sem hann fór fram á að leigja hálfa Tungu til heyskapar.  Bréfið lætur lítið yfir sér, en eins og þeir sem þekktu til Vernharðs vita, þá bjó hann sem bóndi í raun allt sitt æviskeið því hann hélt skepnur í Hnífsdal alla tíð, og lagði mikla áherslu á að gera það vel.

Föstudagspistill 28.mars 2014 >

Skoðið:    Fólk > Jósep Hermannsson og Margrét Katrín Guðnadóttir. Þarna má sjá að það hefur ekki alltaf verið logn og blíða:  Jósep lendir í snarvitlausu veðri og bátur sem hann var á brotnar við Bolungarvík eftir að hafa harkist yfir Djúið. Þá lendir Jósep í snjóflóði ásamt mörgum öðrum.

Þá má nú sjá afsalsbréfið fyrir kaupum Júlíusar og Jóseps á Atlastaðalandi árið 1906, skoðið flipann “Landeigendur”

EnglishUSA